हाकारा । hākārā-ची दोन भागांत प्रकाशित २१वी आवृत्ती ‘मौन’ ह्या सूत्र-संकल्पनेत सामावलेल्या अनेकविध शक्यता-संभाव्यतांचा वेध घेऊ पाहते. मौन म्हणजे निःशब्दता, शांतता, स्तब्धता, ठहराव; मौन म्हणजे नीरवता, नादरहितता. मौन स्वेच्छेने राखलेले असू शकते, तसेच ते बाहेरून लादलेले असू शकते, ते इतरांना स्वमर्जीप्रमाणे वागायला लावण्यासाठीचे शस्त्र असू शकते, किंवा गप्प राहणे ही एखाद्याची सवयही असू शकते. एकंदरीत, ‘मौन’ ही संकल्पना मानवी भाषेतून शब्दांकित होऊ शकत नाही अशा मानवी अनुभवविश्वाच्या अफाट व्याप्तीचे स्मरण करून देते.