हाकारा । hākārā-ची ६वी आवृत्ती ‘रूप-खेळा’च्या संकल्पना-निर्मिती-व्यवहाराला समोर ठेवून मांडली आहे. भवतालातून येणारे अनुभव, राजकीय–आर्थिक रचना, सांस्कृतिक व्यवहार ह्यांच्या परस्परसंबंधांतून कलेची रूपं कशी येतात आणि त्यांतला आशय हा देखील ही रूपं साकारण्यात कोणती भूमिका निभावत असतो, हे या आवृत्तीतील साहित्यातून आणि कलाकृतींतून दर्शवले गेले आहे. रूपांचा आविष्कार हा कलाकाराच्या मनातून, विचारातून, कौशल्यातून तर होत असतोच, पण त्याच्या आजूबाजूच्या परिस्थितीतून, तिथल्या अविरत पण कळतनकळत चालणाऱ्या देवाणघेवाणीतूनही होत असतो, हे येथील ‘रूप-खेळा’च्या मांडणीमागचे सूत्र आहे.