शिल्पा गुप्ता मुंबईत जन्मल्या आणि वाढल्या असून १९९० च्या दशकात त्यांनी जे. जे. स्कूल ऑफ आर्ट मधून फाइन आर्टसमध्ये आपलं शिक्षण पूर्ण केलेलं आहे. गेली दोन दशकं त्या संशोधनावर आधारित सराव आणि मांडणीतून सहभागी, परस्परसंवादी आणि सार्वजनिक परिमाण लाभलेली कला सादर करत आल्या आहेत. लिखित संहिता, रेखाटनं, वस्तू, ध्वनी आणि परस्परसंवादी व्हिडिओ अशा साधनांचा अंतर्भाव करत सीमा-रेषा, सेन्सॉरशिप, समाज किंवा व्यक्तींवर शिक्के मारणं आणि सुरक्षितता अशा विचारांची चिकित्सा याद्वारे शिल्पा आपली सर्जनशील मांडणी करत असतात. त्यांच्या कामाचं प्रदर्शन जगभरातील बिनाले, म्युझियम्स आणि गॅलरीजमधून सातत्यानं होत असतं.